ವಿಟಮಿನ್ ಬಿ12 ನಮ್ಮ ಆರೋಗ್ಯಕ್ಕೆ ಅತ್ಯಾವಶ್ಯವಾದ ಪೋಷಕಾಂಶವಾಗಿದೆ. ಇದರ ಕೊರತೆಯಿಂದ ಮೆದುಳಿಗೆ ಹಾನಿ ಸ್ನಾಯುಗಳು ಶಿಥಿಲಗೊಳ್ಳುವುದುದು, ನರಗಳು ಕ್ಷಮತೆ ಕಳೆದುಕೊಳ್ಳುವುದು ಹಾಗೂ ಒಟ್ಟಾರೆ ಆರೋಗ್ಯ ಬಾಧೆಗೊಳ್ಳುವ ಅಪಾಯವಿದೆ.ಉತ್ತಮ ಆರೋಗ್ಯಕ್ಕೆ ನಮಗೆ ಎಲ್ಲಾ ಪೋಷಕಾಂಶಗಳು ನಿಯಮಿತ ಪ್ರಮಾಣದಲ್ಲಿ ಅಗತ್ಯವಾಗಿವೆ. ಪ್ರೋಟೀನುಗಳು, ಖನಿಜಗಳು ಮತ್ತು ವಿಟಮಿನ್ನುಗಳು ಇವುಗಳಲ್ಲಿ ಪ್ರಮುಖವಾಗಿವೆ ಹಾಗೂ ನಿತ್ಯದ ಎಲ್ಲಾ ಕಾರ್ಯಗಳಿಗೆ ಅವಶ್ಯವಾಗಿವೆ. ಇವುಗಳಲ್ಲಿ ಒಂದಾದರೂ ಪೋಷಕಾಂಶದಲ್ಲಿ ಕೊರತೆ ಉಂಟಾದರೆ ಇದು ಗಂಭೀರ ಕಾಯಿಲೆಗೆ ಕಾರಣವಾಗಬಹುದು.
ವಿಟಮಿನ್ ಬಿ12 ಇಂತಹ ಒಂದು ಅತ್ಯಂತ ಅವಶ್ಯಕ ಪೋಷಕಾಂಶವಾಗಿದೆ ಹಾಗೂ ಇದರ ಕೊರತೆಯಿಂದ ಮೆದುಳು ಮತ್ತು ನರವ್ಯವಸ್ಥೆಯ ಮೇಲೆ ಗಂಭೀರ ಪ್ರಭಾವ ಬೀರುತ್ತದೆ. ಈ ಅವಶ್ಯಕ ಪೋಷಕಾಂಶದ ಬಗ್ಗೆ ನಾವೆಲ್ಲರೂ ಅರಿತಿರಬೇಕಾದ ಮಾಹಿತಿಗಳನ್ನು ಇಂದಿನ ಲೇಖನದಲ್ಲಿ ವಿವರಿಸಲಾಗಿದೆ, ಬನ್ನಿ, ನೋಡೋಣ:
ವಿಟಮಿನ್ ಬಿ12 ದೇಹಕ್ಕೆ ಏಕಾಗಿ ಇಷ್ಟು ಅವಶ್ಯಕ?ತಜ್ಞರ ಪ್ರಕಾರ, ವಿಟಮಿನ್ ಬಿ12 ಪೋಷಕಾಂಶವನ್ನು ‘ಕೋಬಾಲಾಮೈನ್’ ಎಂದೂ ಕರೆಯಲಾಗುತ್ತದೆ. ಇದು ಮೆದುಳಿನ ಕಾರ್ಯನಿರ್ವಹಣೆಗೆ ಅತಿ ಅವಶ್ಯವಾದ ಪೋಷಕಾಂಶವಾಗಿದೆ.ಅಲ್ಲದೇ ಕೆಂಪು ರಕ್ತಕಣಗಳ ರಚನೆಗೆ ಮತ್ತು ಡಿ ಎನ್ ಎ ನಿಯಂತ್ರಣಕ್ಕೂ ಅಗತ್ಯವಾಗಿದೆ. ವಿಟಮಿನ್ ಬಿ12 ಕೊರತೆ ಎದುರಾದರೆ ದೇಹದಲ್ಲಿ ನರಮಂಡಲಕ್ಕೆ ಸಂಬಂಧಿಸಿದ ತೊಂದರೆಗಳು ಎದುರಾಗಬಹುದು.
ವಿಟಮಿನ್ ಬಿ12 ಕೊರತೆಯಿಂದ ಎದುರಾಗುವ ಕಾಯಿಲೆಗಳು.ತಜ್ಞರ ಪ್ರಕಾರ ಉತ್ತಮ ಆರೋಗ್ಯಕ್ಕೆ ಸಾಕಷ್ಟು ಪ್ರಮಾಣದಲ್ಲಿ ನಮಗೆ ವಿಟಮಿನ್ ಬಿ12 ಲಭಿಸುತ್ತಲೇ ಇರಬೇಕು. ಈ ಪೋಷಕಾಂಶ ಸಾಕಷ್ಟು ಪ್ರಮಾಣದಲ್ಲಿ ಲಭಿಸದೇ ಹೋದರೆ ಮೊದಲಾಗಿ ಇವರ ದೇಹದ ತೂಕ ಇಳಿಯಲು ಪ್ರಾರಂಭಿಸುತ್ತದೆ.
ಸ್ನಾಯುಗಳು ಶಿಥಿಲಗೊಳ್ಳತೊಡಗುತ್ತವೆ ಹಾಗೂ ಚರ್ಮದ ಬಣ್ಣ ಹಳದಿಯಾಗಲು ತೊಡಗುತ್ತದೆ. ವಿಟಮಿನ್ ಬಿ12 ಕೊರತೆಯಿಂದ ನರವ್ಯವಸ್ಥೆಗೆ ಹಾನಿ ಎದುರಾಗುತ್ತದೆ.ಈ ವ್ಯಕ್ತಿಗಳು ಭ್ರಮಾಧೀನರಾಗಲು ತೊಡಗುತ್ತಾರೆ ಹಾಗೂ ಅರಿವಿಗೆ ಸಂಬಂಧಿಸಿದ ಕಾರ್ಯಗಳನ್ನು ಸಮರ್ಥವಾಗಿ ನಿರ್ವಹಿಸಲು ಸಾಧ್ಯವಾಗದೇ ಹೋಗುತ್ತಾರೆ. ಕೆಂಪು ರಕ್ತಕಣಗಳು ಸಾಕಷ್ಟು ಪ್ರಮಾಣದಲ್ಲಿ ಸೃಷ್ಟಿಯಾಗದೇ ಹೋಗುತ್ತವೆ.
ಈ ಬಗೆಯ ರಕ್ತಹೀನತೆಯನ್ನು ಮೆಗಾಲೊಬ್ಲಾಸ್ಟಿಕ್ ರಕ್ತಹೀನತೆ ಎಂದು ಕರೆಯಲಾಗುತ್ತದೆ ( ಪರ್ನಿಶಿಯಸ್ ಅನೀಮಿಯಾ ಅಥವಾ ವಿನಾಶಕಾರಿ ರಕ್ತಹೀನತೆ).ದೇಹದ ಪಾದ, ಹಸ್ತದ ಭಾಗಗಳಲ್ಲಿ ಚಿಕ್ಕದಾಗಿ ಸೂಜಿ ಚುಚ್ಚಿದಂತಹ ಅನುಭವ, ಬಾಯಿಯ ಹುಣ್ಣುಗಳು, ಖಿನ್ನತೆ, ನಾಲಿಗೆ ಕೆಂಪಗಾಗಿ ಉರಿಯುವುದು (ಗ್ಲಾಸೈಟಿಸ್), ಇಲ್ಲದ ಸದ್ದುಗಳು ಕೇಳಿಸುವುದು (ಟೈನಿಟಸ್), ಹಸಿವಿಲ್ಲದಿರುವುದು, ತೂಕ ಇಳಿಕೆ, ದೃಷ್ಟಿ ಮಂಜಾಗುವುದು ಮೊದಲಾದ ಲಕ್ಷಣಗಳು ಕಾಣಿಸಿಕೊಳ್ಳಬಹುದು.ಹದಿನೆಂಟು ವರ್ಷಕ್ಕೂ ಮೀರಿದ ಪ್ರತಿ ವಯಸ್ಕ ವ್ಯಕ್ತಿಗಳು ಕನಿಷ್ಟ ದಿನಕ್ಕೆ 2.4 ಮೈಕ್ರೋಗ್ರಾಂನಷ್ಟು ವಿಟಮಿನ್ ಬಿ12 ಸೇವಿಸಬೇಕೆಂದು ವಿಶ್ವ ಆರೋಗ್ಯ ಸಂಸ್ಥೆ ಶಿಫಾರಸ್ಸು ಮಾಡಿದೆ.
ವಿಟಮಿನ್ ಬಿ12 ಮೂಲಗಳು-ವಿಟಮಿನ್ ಬಿ12 ಹಲವಾರು ಮಾಂಸಾಹಾರಗಳಲ್ಲಿ ಹೇರಳವಾಗಿ ಲಭ್ಯವಿದೆ. ಕೋಳಿ, ಕುರಿ ಮಾಂಸ, ಮೀನು ಮತ್ತು ಮೊಟ್ಟೆಗಳಲ್ಲಿ ಇದು ಸಾಕಷ್ಟು ಪ್ರಮಾಣದಲ್ಲಿ ಲಭ್ಯವಿದೆ. ಪ್ರಾಣಿಜನ್ಯ ಆಹಾರಗಳಲ್ಲಿಯೂ ಇದು ಲಭ್ಯವಿದೆ.ವಿಶೇಷವಾಗಿ ಮೊಟ್ಟೆಯಲ್ಲಿ ವಿಟಮಿನ್ ಬಿ2 ಮತ್ತು ವಿಟಮಿನ್ ಬಿ12 ಎರಡೂ ಇರುತ್ತವೆ. ಒಂದು ಮೊಟ್ಟೆಯ ಸೇವನೆಯಿಂದ ದೈನಂದಿನ ಅಗತ್ಯದ 46 ಶೇಖಡಾ ವಿಟಮಿನ್ ಬಿ12 ಪಡೆಯಬಹುದು.ಆ ಪ್ರಕಾರ ದಿನಕ್ಕೆ ಎರಡು ಮೊಟ್ಟೆಗಳನ್ನು ಸೇವಿಸಿದರೆ ಉಳಿದ ಎಂಟು ಶೇಖಡಾವನ್ನು ಇತರ ಆಹಾರಗಳ ಮೂಲಕ ಪಡೆದು ಪೂರೈಸಿಕೊಳ್ಳಬಹುದು.
ವಿಟಮಿನ್ ಬಿ12 ಇರುವ ಸಸ್ಯಜನ್ಯ ಆಹಾರಗಳು-ವಿಟಮಿನ್ ಬಿ12 ಹಲವಾರು ಸಸ್ಯಜನ್ಯ ಆಹಾರಗಳಲ್ಲಿಯೂ ಲಭ್ಯವಿದೆ. ಆದರೆ ಮುಖ್ಯವಾಗಿ ಹಾಲು, ಮೊಸರು ಮತ್ತು ಚೀಸ್ ನಲ್ಲಿ ಇವು ಹೆಚ್ಚಿನ ಪ್ರಮಾಣದಲ್ಲಿವೆ.
ಉಳಿದಂತೆ ಬಾದಾಮಿ, ಗೋಡಂಬಿ, ಓಟ್ಸ್ ಮತ್ತು ತೆಂಗಿನ ಹಾಲಿನಲ್ಲಿಯೂ ಮಿತ ಪ್ರಮಾಣದಲ್ಲಿದೆ. ಆದ್ದರಿಂದ ವಿಟಮಿನ್ ಬಿ12 ಅನ್ನು ಪಡೆಯಲು ಹಾಲು ಮತ್ತು ಹಾಲಿನ ಉತ್ಪನ್ನಗಳನ್ನು ಸಾಕಷ್ಟು ಪ್ರಮಾಣದಲ್ಲಿ ನಿತ್ಯವೂ ಸೇವಿಸುವುದು ಸಸ್ಯಾಹಾರಿ ವ್ಯಕ್ತಿಗಳಿಗೆ ಅಗತ್ಯವಾಗಿದೆ.ಒಂದು ವೇಳೆ ದೇಹದಲ್ಲಿ ವಿಟಮಿನ್ ಬಿ12 ಕೊರತೆ ಇದ್ದರೆ, ನೀವು ಈ ಕೆಳಗಿನ ಸಂಗತಿಗಳನ್ನು ಅರಿತಿರಬೇಕು.ವಿಟಮಿನ್ ಬಿ12 ಕೊರತೆ ಇರುವ ವ್ಯಕ್ತಿಗಳಿಗೆ ಮದ್ಯ ನಿಷಿದ್ಧವಾಗಿದೆ. ಒಂದು ವೇಳೆ ವ್ಯಸನಿಯಾಗಿದ್ದರೆ ಇದನ್ನು ತ್ಯಜಿಸುವ
ಪ್ರಾಮಾಣಿಕ ಪ್ರಯತ್ನವನ್ನು ತಕ್ಷಣವೇ ಪ್ರಾರಂಭಿಸಬೇಕು.ಮದ್ಯಸೇವನೆ ಈ ಕೊರತೆಯನ್ನು ಇನ್ನಷ್ಟು ಹೆಚ್ಚಿಸುತ್ತದೆ.ಫೋಲಿಕ್ ಆಮ್ಲದ ಸೇವನೆ ಅಥವಾ ಈ ಅಂಶವಿರುವ ಔಷಧಿಗಳನ್ನು ಸೇವಿಸುತ್ತಿದ್ದರೆ ವೈದ್ಯರ ಸಲಹೆ ಪಡೆದು ಇವುಗಳ ಪ್ರಮಾಣವನ್ನು ತಗ್ಗಿಸಬೇಕು.ಈ ಲಕ್ಷಣಗಳಲ್ಲಿ ಯಾವೊಂದು ಕಂಡುಬಂದರೂ ತಕ್ಷಣ ವೈದ್ಯರಿಂದ ಪರೀಕ್ಷೆಗೊಳಪಟ್ಟು ಚಿಕಿತ್ಸೆಯನ್ನು ಪ್ರಾರಂಭಿಸಬೇಕು.ಅಲಕ್ಷಿಸಿದರೆ ಇದು ಸರಿಪಡಿಸಲಾಗದಷ್ಟು ಹಾನಿ ಉಂಟು ಮಾಡಬಹುದು ಹಾಗೂ ಈ ನಿರ್ಲಕ್ಷ್ಯ ಮಾರಣಾಂತಿಕವೂ ಆಗಬಹುದು.
